Day 1 16 March 2006
Alas nuwebe ng umaga ay nasa Robinson’s Dasmarinas (Pala-pala) na kami ni Chito, nag-aabang sa tapat ng Jollibee sa iba pa naming mga kasamahan sa isa na namang adventure ng ITMC Cloudratz, sa Mt. Batulao, Nasugbu, Batangas. Maya-maya’y isa-isa nang nagdatingan ang mga kasamahan namin, napagpasyahan muna naming mag-agahan sa Jollibee habang ang iba’y may pagkakataong makapamili pa sa Supermarket ng kanilang babaunin. Mag-aalas-onse ng tanghali sumakay na kami ng bus patungong Nasugbu, matapos ang halos isang oras na biyahe narating na namin ang aming jump-off point: ang Evercrest Golf & Country Club. Marahil ay nagtataka kayo kung baket Golf Club, ako rin eh… pero dun talaga papasok sa lugar na iyon ang aming destinasyon. Napagkasunduan muna naming mananghalian sa katapat na karinderya para may lakas kami at hindi gutumin sa paglalakad, doon na rin kami nagsipaghanda para sa aming pag-akyat…
Ala-una ng tanghali, sa kasagsagan ng init ng haring araw ay naglalakad kami patungo sa bundok ng Batulao, hango ito sa pangalang "Bato Sa Ilaw", ayon sa mga kuwento makikita mo raw ang kagandahan ng liwanag ng buwan sa gitna ng dalawang nagtataasang bundok kaya’t ito ay ipinangalang Batulao o "Bato Sa Ilaw". Masaya habang naglalakad, "walk in the park" ika nga… kada pahinga kain, inom ng softdrinks, inom ng buko…hehehe. Sobra nga lang init, dagdag pa ang nagkakaingin ng araw na iyon… para tuloy kaming iniihaw sa gitna ng araw.. alas kuwatro ng hapon ay narating na rin namin ang camp one, dito nagparehistro kami at nagbayad, nagpasya na rin kaming dito na muna magpahinga matapos ang ilang pahinga…hehehe!
Mga alas-singko y medya ng hapon ay narating na namin ang camp seven, kung saan namin napagpasiyahang palipasin ang gabi.. nagsimula na naming itayo ang aming mga tent at naghanda na rin para sa aming hapunan… alas-siyete ng gabi, "socials! socials! socials!" siyempre hindi puwedeng mawala ang inuman, lalo na’t anjan si Jorge, si Edward, si Jojo, si Oni, si Chito at Ako!…hehehehe! Mga alas-diyes ng gabi ay dumating naman sina Lakay at Larry, mga nag-night trek, at meron silang dalang kuwentong makapanindig balahibo, mga naranasan nila habang binabagtas nila ang daan patungo sa aming camp site.
Day 2 17 March 2006
Alas-singko y medya ng umaga ay binabagtas na namin ang trail pataas patungo sa summit… hindi pala ganun kadali, akala ko "walk in the park" na naman..mas mahirap pa pala ang daan nito patungo sa summit kaysa sa naranasan ko sa Pulag… durog na kasi ang trail at madulas.. kailangan naming mag-ala-spiderman o kaya’y parang talangka… pag dating sa summit, sulit naman ang view, 360 degrees tanaw mo ang batangas, cavite at laguna… siyempre hindi pwedeng mawala ang picture taking… pose! pose pa!… maya-maya’y heto na naman ang isa pang problema: ang pagbaba, kung gano kahirap umakyat, mas mahirap bumaba… pag dating sa camp site ay nagsimula na kaming magligpit ng gamit at kumain ng almusal… maya-maya pa’y tinatahak na namin ang daan pababa, pagdating sa camp one ay nagpahinga at napagpasyahang dito na lang mananghalian… mga alas dos ng hapon ay narating na rin namin ang Evercrest, dito kami nagpalit ng damit at kumain ng halo-halo (hindi namin ito nagawa kahapon)… ilang saglit ang nagdaan ay sakay na kami ng bus at binabagtas na ang aming daan pauwi… isa na namang nakakapagod ngunit masayang adventure ng ITMC Cloudratz… hanggang sa muli…
